اه يا مصر يا وجعه قلبى عليكى

Mohammed Ali · **مرسل:** الجمعة يناير 01, 2010 4:12 am

[center]ناولني فرشة ياعم وشوية الوان

اصلي ناويت ارسم وطن

ماتخافش ...مافيش قلق

دي كلها شخابيط ورق

لا فيه حكومة ولا معارضة ولا برلمان

ده اصل الحكاية كلها

شوية هلفطة في منام

لواحد صبح لقي نفسه عريان

هو برضو الورق يقدر يعمل وطن!!!

لكن تقول ايه بقي في تخاريف واحد خرفان

.................................................. .....................

الوان ايه !!!؟؟؟

هو انت ماتعرفش مطلوب الاوطان؟

شكلك تعليمك خواجاتي ياعم وهاتتعبني وياك

طيب قول عندك ايه وانا اخد اللي اشوفه كسبان

.................................................. ..............

ابيض ؟؟؟ !!!!!!!!!!!!!!!!!!!!!!

يانهار الوان

وده اعمل بيه انا ايه

باقولك هارسم وطن

مش باقولك شكلك نعسان

ياعم قالولنا زمان

في القراءة والمطالعة والتاريخ وكل اشي كان

ان الوطن يعني اشجان

يعني ناس بتنداس بالقطارات

وناس بتموت بالسرطانات

وناس في عبارات غرقانة

وعيون بالدموع مليانة

وسما معبية دخان

طيب قولي انت بقي بزمتك

منين الابيض هايبان؟؟؟؟؟!!!!!!!!

.................................................. ..........................

احمر ايه ياعم

لالالا اسمع كلامي

دي بضاعة خسرانة ولون ماهواش مطلوب

الدم بس دلوقتي علي السكك وفوق الرصفان مسكوب

الدم في عروق الجدعان ؟؟؟؟

بخ

كان زمان

لا كانت بنات بتتعاكس

ولا عجوز واقف بيفكر

هايلاقي كرسي في اتوبيس

ولا خطفوه الشبان؟؟؟

ولا اقولك

اديني منه شوية

ده برضو ساعات الاحمر يكسب

هي مش سهرات كباراتنا بتترسم بالوان؟؟؟؟

.......................................

ازرق؟

استني كدة .....مش عارف

ياتري لسة فيه نيل بيترسم ومية وشطآن

ولا الحكاية كلها خلصت

واتباعت قصور وفيلات ونايل فيو

ومخلفات مصانع

واشرب ياغلبان

ولا ارسم مراكب في النيل بتغرق

ورشيد اهي هناك

اسألها تشهد

هي هدوم الغرقانين بيميزوا فيها الوان؟

............................................

استني

قبل ماتمشي

لو عندك ازرق غامق ......هاته

ياشيخ ده ريحته تجنن

واهو برضو ليه سهراته

ده حتي ساداتنا زمان

ياما عاشوا في ملذاته

واخر الحدوتة نهبونا

وسابونا في كل حتة بنتهان

.................................................. ............

الاصفر اه ده هات منه كتير

دي اصلها صحرا كبيرة وقالولنا في كل خطوة بير

اشي بترول وفحم

ودهب وحديد وقصدير ....

قولي صحيح ...هي الانابيب لونها ايه ؟

ايوة ياعم دي بتاعة الغاز

بتاع اخواتنا شلومو وشامير

ولا دي في الصورة مش هاتبان؟

ماهي مدفونة

وفي بلدنا علمونا

ان اللي مش علي السطح مالهوش مكان

خايف ارسمها خطوط سودا وسط اللوحة

ساعتها مش هالاقي للاصفر مكان

.................................................. ......

قالولنا في حصص العلوم زمان

ان الاسود يعني مافيش الوان

يعني كل شيء عن الرؤية اتحجب

يعني الدنيا باظت

والشمس غابت

والليل وجب

واديك شايف حال البلد

ليل طويل من غير امل

في فجر من الليل يتولد

اقولك كلمة ياعم وتسمعها ؟

لو عندك باقي من الاوان. بيعها

واشتري لون الاحزان

ده في بلدنا دايما هو الكسبان

.................................................. ....................

استني

انت هاتمشي ولا ايه ياعم.....

هو انت كدة على طول بتخم ؟

لسة فيه حاجات كتيرة مالقتلهاش الوان

هو الوطن ينفع من غير كوسة وقرع وبتنجان ؟

طيب الرشوة ...اعمل فيها ايه ؟

والجهل... والفساد... والنهب

طيب انتخابات مجلس الشعب

كل ده مالهوش حسبان ؟

بلاش كل ده

طيب الجرايد القومية

وفرق المطبلاتية

والواسطة ...والمحسوبية

كل ده ماتعرفهوش ؟... ما ارسمهوش ؟

ولا كأنه ما كان ؟

تصدق بايه ياعم انت

انت قرفتني

زهقتني

وعلشان خاطرك بقي

انا مش عايز وطن

وهاتنازلك عن السكن

تحب اكتبلك وصيتي بالكفن ؟

روح ياعم

مش عاوز حاجة منك

بايدي انا هاعمل الواني

بايدي انا هارسم اوطاني

بايدي وبايدين الجدعان

هانرسم علم

مصنوع هنا

مكتوب عليه صنع الوطن

ماهواش صيني

ولا امريكاني

ولا مصنوع في ايران[/center]

Iron man · **مرسل:** الأحد يناير 03, 2010 10:30 pm

ايه الحلاوة دى يا عم محمد...تسلم ايدك على هذا الموضوع الرائع يا امير الثقافة العامة

القماطى · **مرسل:** الاثنين يناير 04, 2010 3:57 am

زجل جميل يا حاج محمد
خالص احترامى وتقديرى

البدر · **مرسل:** الاثنين يناير 04, 2010 5:16 pm

يالله
جزاكم الله خيرا يا محمد
الموضوع اشعرنى بنزف قلبى حزنا وألما

يارب اصلح احوالنا
اللهم أنعم على مصر من خيرك
وأصلح أحوالها
واحفظها يارب من كل من يكيد لها

فراشة النور · **مرسل:** الاثنين يناير 04, 2010 5:21 pm

والله موضوع روووعه جزاك الله خيرا اخي

fsh · **مرسل:** الثلاثاء يناير 05, 2010 11:36 am

البدر كتب:

يالله
جزاكم الله خيرا يا محمد
الموضوع اشعرنى بنزف قلبى حزنا وألما

يارب اصلح احوالنا
اللهم أنعم على مصر من خيرك
وأصلح أحوالها
واحفظها يارب من كل من يكيد لها

امين يارب العلمين بارك الله في القائمين علي المنتدي

hema88 · **مرسل:** الأربعاء يناير 06, 2010 3:28 pm

اية الجمال دة يا ابو على
بجد حاجة جميلة
تسلم ايديك

hema · **مرسل:** الأربعاء يناير 06, 2010 4:41 pm

والله حاجه جميله اوي
بس ياتري ده تاليفك ولا منقول
علي كال حال
جزاك الله خيرا.

القماطى · **مرسل:** الاثنين فبراير 08, 2010 10:36 pm

اشكرك
وكمان اشكر اخى fsh على دعاءة المستمر للقائمين على المنتدى

تسجيل الدخول

اه يا مصر يا وجعه قلبى عليكى

الموجودون الآن